踏入龙年，陈晓东跟七师傅(七仙羽)大玩 crossover，先搞搞震炒热庙街夜缤纷，刺激香港经济；再化身「东七」组合杀落「红馆」(怀旧歌厅)，兴奋大唱《欢乐年年》、《东方之珠》应节。嘹亮歌声令台下观众拍烂手掌，high爆东东更懒理唱到甩晒beat的师傅，跟驻场**歌手于小舞台上翩翩起舞抢晒fo，唱完更大爆在内地工作经常「濑嘢」，而家行得走得绝对执身彩。
▲陈晓东跟七师傅(七仙羽)炒热庙街夜缤纷。
当日一身人形红包袋的七师傅，拍住有巨型龙头金鈪「护身」的东东落区，前者阴阴嘴笑浮夸的后者：「龙头都出埋喎？」东东得戚回应：「要用金光闪闪龙头嚟吸金及辟邪，要用啲金器嚟射住大家，被闪亲嘅都会行好运！」
两人出巡期间成为流动「打咭」胜地，街坊都大赞两人靓仔、靓女；又有人叫七师傅做「仙女」，甚至有途人搞笑地问东东攞电话号码，东东出道多年非省油灯，笑住话「我老婆唔畀！」当两人行到去串烧档，东东更亲自为来自印度的旅客烤串烧，七师傅笑指旅客好lucky，因为获*明星下厨，着对方上网搜寻Daniel Chan数据。
去年生日会上，东东表示已入纸申请8月的红馆档期，希望能成事。师傅为人为到底，第2站带东东去唔使申请，可自出自入唱歌的「红馆」(怀旧歌厅)！既惊且喜的东东好奇追问七师傅：「平**有冇唱歌？」师傅口快快连讲两次：「我钟意唱你首《卖火柴》。」东东忍唔住更正：「系《划火柴》呀。」七师傅若无其事说：「一样啫。」待东东夹好key后，七师傅在台上宣布：「红馆演唱会就喺呢度开始喇，呢个演唱会搞到好乱呀，啲人可以随意上到台，不过个台好稳阵呀。」眼见东东好满意「红馆」show，七师傅再玩大啲，push埋驻场**歌手上台伴舞：「斋唱唔跳舞？阿姐伴舞呀。」东东即被气氛带动又唱又跳high到爆，唱到最后还向台下观众挥晒手，提前玩爆「红馆」。
另外，属兔的东东连犯两年太岁令元气受损，七师傅指东东好坚强，而且做事比较稳阵，所以唔会损手烂脚，但要留意太岁年会同老婆多咗「拗撬」，师傅还爆料：「佢大把钱，唱歌只系为兴趣。」东东避谈富贵：「咁都想有啲新作品。」面对大环境唔系咁好，东东分享逆境心得，笑中有泪：「我试过喺内地拍戏只脚叉咗落坑渠，要当众除裤淋清水去污；又试过喺内地一个颁奖礼中，唱唱吓歌个舞台突然间穿咗窿，我一只脚插咗入去相当狼狈，见刘德华、陈慧琳狂笑，我秒速爬返起身，扮型去多谢观众…其实冇受伤已执身彩，发脾气系解决唔到件事，每个人都要向前行，几咁好，几咁差都唔会去到最尽，所以保持心态平衡好重要，要同自己讲『我可以撑过去』。」
MIRROR继续有运行
2024年踏入九运，七师傅叮嘱今年唔好掂楼市股市，因为股市会有**动，最多游走14000至22000点内，唔系个个有钱玩得起；喺九运嘅楼市更会大跌最少3成，但之前升得太高又未到捞底。
▲七师傅称江涛和卢瀚霆今年仍然很旺。
至于犯太岁的，太岁年唔好搞生意；可多放啲水种鲜色花来催旺东面『人缘位』吸桃花；西北文昌位放13层文昌塔及绿色大叶植物吸大贵人，有助名利双收，个人都会靓啲。另外，九运虽然旺中女，但MIRROR继续有运行：「因为冇人钟意睇大妈唱歌㗎，佢哋成个Team都当旺，冇人阻到佢哋气势，就算姜涛身形变肥都不受影响，因为佢一生都好红好旺。」
采访：方骞平 摄影：邓国良
