67岁“不老男神”吕良伟坐拥数十亿身家，近年努力研习气功，不时在网上分享回春心得，造福人群。虽然结婚23年，但仍获唔少内地进击索女“约食饭”，睇得好透的吕哥唔会畀任何机会，火速落闸，又赞老婆越嚟越靓，仲话唔值得为“执一粒芝麻冇咗个西瓜。”另外，有情有义的吕哥罕谈已故旧爱周海媚：“我哋有缘冇份，但有好多美丽回忆。”
▲Keep住身形嘅吕哥会拣食啲好西。
1980年，吕良伟以剧集《上海滩》“丁力”一角一炮而红；1991年的电影《跛豪》亦成为代表作。虽然在演艺界早已上神台，他吕哥仍自我研发抗衰老的简单养生课程，将30年来学习的武功结合气功创作出独门功夫，开班授课：“练精、气、神主要系针对五脏六腑，内练一口气外练筋骨皮，系内外兼收，而且由基础开始，男女啱用。”阿吕爆老婆练咗4年，瘦咗又靓咗，变得精神饱满；甚至有不育嘅女仕练完，生咗一子一女。
澄清唔系“百亿驸马”
吕哥经历过3段婚姻，“后生唔成熟，都几自我及大男人，依家明白一个家庭会以爱行先，乜都老婆话事，佢开心咪得啰，咁家庭会幸福及和谐啲，我同小娟结咗婚23年冇乜嗌交，我有个‘85/15’定律，一个家庭85%责任由男人承担，由太太管理财政；事无大小听佢意见。”对于被指“百亿驸马”，当年靠老婆大翻身，吕哥理直气壮澄清：“啲人唔识我觉得系啫！佢(老婆)系多(钱)，但我都唔少呀！哈...我个心知，人哋点讲系人哋嘅事，我冇办法阻止人哋把口及思想，只能做好自己。”吕哥强调心态好强大，唔使老婆安慰：“因为我做紧乜，有冇使佢钱，佢同个仔系知㗎嘛！我个仔仲话‘爹哋揾钱畀屋企；妈咪揾嘅钱系妈咪嘅。’男人个价值系乜呀？如果冇办法为屋企创立到财富，个女人都睇你唔起啦，系咪？”他又乘机解释，1997年曾被拖车系遭细佬拖累：“细佬用公司印章出车，我根本唔知情，连部车都未见过，及后已清晒尾数。”
执粒芝麻冇咗个西瓜
有钱又有面，吕哥直言在内地拍戏常遇诱惑：“呢啲事经常出现，自己知自己咩身份(人夫)，会守住本份，北上拍戏会带埋两个助手，远离剧组住另一边，收工就返房。”他认为畀机会人系自己嘅事，绝对唔系单向：“对方唔系傻，都会感受得到。”他自爆曾有索女约“食饭”，为打圆场装作听唔明，全面落闸：“话好多嘢做，唔得闲”吕哥认真说：“就算佢好索又如何呢？唔关我事㖞，我唔系细路，会识得衡量家庭重要定去玩重要啲，值唔值得‘执一粒芝麻冇咗个西瓜’，贪一时之快惹一身蚁咪好傻啰，更何况我老婆都好靓，而且越嚟越靓。娶个老婆系希望佢几时都咁开心、幸福及有自信。”吕哥坦言曾有思想出轨时候，但保证唔会有行动，唔想老婆受伤害。
▲两夫妇恩爱举动羡煞旁人。
好想做导演拍另类嘢
吕哥罕谈已故旧爱周海媚，指两人有好多经历及美好回忆。“当年我哋相处得好开心，我冇做过伤害对方嘅事，只系后生时性格自我唔肯相让，变咗大家有缘冇份，及后见返面都有倾有讲，我个心好锡佢，佢系一个几乖几纯嘅女仔，亦系嗰段时间嘅最爱。”另外，吕哥坚持字典中冇退休二字：“咩叫唔使捞呀？就算有千亿身家都要做，要有存在价值，有时间有能力就多做善事。(有咩仲想做？)我未做过导演，希望有机会拍另类题材，讲下人性，而我只系演一个小角色，主力培育新人，香港有好多好演员，如《九龙城寨之围城》‘城寨四子’，见佢哋好搏，做演员一定要拼搏精神；仲有黄子华喺《毒舌大状》表现都唔错。”热爱工作的吕哥暂时唔会拍剧；可有可无嘅电影角色都唔考虑。
