2023年尾落实迎娶王青霞（Chris）的李龙基，去年初却被《星岛头条》踢爆突然玩缩沙，将婚期无限期押后。事隔一年，基哥坚持会履行结婚承诺唔会走数，倒数Chris获释日子还有5个月(7月7日出狱)，74岁的李龙基强调一定会做蛇年新郎。情深款款的基哥除了在本月25日举行的《笑看人生演唱会》中隔空向Chris唱情歌外，更落金铺拣足金手鈪做定情信物来表达诚意：“等佢对‘老公’有返啲信心。”
▲基哥每提Chris就悲从中来。
形容跟Chris情比金坚的李龙基，新春期间到深水埗一间金铺拣金饰，自言要畀少少信心Chris，话佢知：“今年一定找数娶硬佢。”虽然店主力推价值6万多元嘅“镇店之宝”流星锤双囍龙凤鈪，但基哥却心仪每只重4钱多的幼身金鈪，坚持不怕被人笑寒酸，还得戚地解释：“我哋讲心唔讲金，而且知道Chris口味，佢比较钟意简约嘅长青款式，代表住永恒。”
提狱中“老婆”心痛流泪
基哥本月25日在文化中心开个唱，票房反应热烈，他透露将会凭歌寄意送上李克勤的《一生不变》及张德兰嘅《情义两心坚》畀Chris。每当提到服刑中的Chris，基哥就老泪纵横，见他多次唉声叹气，纵使强忍呜咽声，仍谷到双眼通红，最后掩面道：“好多次经过河上乡(罗湖惩教所附近)都好心嗡，我喺出面同朋友聚会风花雪月，佢就一个人喺入面，我乜都做唔到…”基哥强调不会理会假喊评论：“就算话我喺度做喊戏都冇所谓，依家我好少睇网上留言及报道，始终系两个人之间嘅事，人哋讲乜咪由佢啰。”
派定心丸做背后女人
74岁的基哥不再受任何影响做喜欢的事：“适值系双春兼闰月，而且冇犯太岁，结婚一定会系今年嘅事，到时摆几围同亲友食饭。”基哥相信Chris出来之后会重新做人：“佢经过反思后知道自己嘅不足，从书信中感受到佢经已戒嚣张。其实都系怪我太锡佢，知道佢自尊心强，以前就算佢唔讲，但我好精明，好多嘢我都知，一直采取鸵鸟政策，只眼开只眼闭，明知佢做得唔啱都冇出声，亦疏忽咗严重性，结果闯出大祸要承受返过错，依家佢才肯诚实话返我知，所以我同佢讲咗‘以后唔好怪我唔再纵容你，觉得唔啱会出声，咁做都系为你好。’而佢出狱后想低调地过啲平静生活，做我背后嘅女人，我都觉得佢以前太高调唔系太好。”
爆青霞贪他穷愿死跟
对于一直不被看好的“爷孙恋”，基哥有话要说，不吐不快：“我有返咁上下年纪，仍难得搵到个真心肯为我付出嘅老伴而高兴，以前我唱酒楼，佢会笑咪咪喺台下望住我；我哋会好有情趣咁坐喺沙发上听英文老歌...喺呢个世界想搵到个欣赏你嘅人唔容易，只要我欣赏佢；佢欣赏我就够，呢份满足感只有自己才感受到，好多金银都未必有咁开心！同佢一齐就算有牺牲都系值得。”另外，上月李龙基在村屋住所内自弹自唱关正杰的歌曲《雪中情》隔空送畀Chris，被发现家居简陋，兼有岁月痕迹，更全屋杂物，基哥直认只是过住普通人的生活：“我净身出户乜都冇带走，返到香港唯有租屋住，间村屋住咗6年，由新屋畀我住到变旧。”他又爆Chris系贪他穷：“佢知我乜环境㗎，不过，甘愿跟住我，外边人系谂唔到嘅。多年嚟Chris喺我身边帮咗我好多，会帮我整层架，将模型飞机零件分类放好，依家我懒执屋，将啲嘢乱咁放，屋企变得乱糟糟，试过因为撞到杂物跌亲。”
